!د ہلیز کے پار۔۔۔۔۔۔۔۔۔

”ہم” ہم ہیں اور ”وہ” وہ ۔ ہمارے درمیان اتنا ہی فاصلہ ہے جتنا کہ مشرق اور مغرب میں ہونا چاہیے ۔ ہم معززینِ مغرب ہو کر بھی ”وہ” نہیں بنتے وہ خوارِ مشرق ہو کر بھی ”ہم” بن جاتے ہیں ۔ ہمارے بیچ صرف فرق نہیں تفریق ہے ۔ جو کام ہم کرتے ہیں وہ کرنا نہیں چاہتے اور جو کام وہ کرتے ہیں ہم کر نہیں سکتے ۔ ہماری سوچیں بلند ہیں اور کام پست اُن کی سوچیں پست ہیں اور کام بلند ۔ ہم سب مسلمان ہیں اور وہ سب صرف سلمان (سلمان رُشدی) ۔ ہم آپسمیں لڑ کر تماشہ دکھاتے ہیں اور وہ ہمیں لڑا کر تماشہ دیکھتے ہیں ۔ ہم ترقی پذیر ہیں اور وہ ترقی یافتہ ۔ ہم عورتوں کی چادریں چھین کر فخر کرتے ہیں اپنی ترقی پر اور وہ ہم سے چادریں چنوا کر فخر کرتے ہیں اپنی عقل پر ۔ ہم دل کی بات مانتے ہیں وہ دماغ کی ۔ ہمارے ہاں دِل تھوک کے حساب سے ملتے ہیں اور ان کے ہاں دماغ ۔ ہم سارے عاشق ہیں وہ سائنسدان ۔ ہم اس لیے ترقی یافتہ نہیں ہیں کہ ہم سہل پسند ہیں وہ اس لیے ترقی یافتہ ہیں کہ وہ سہل پسند نہیں ہیں ۔ ہم گفتار کے غازی ہیں وہ عمل کے ۔ چاند پر ہم اس لیے ابھی تک نہیں پہنچ سکے کہ ہم تنقید کرتے ہیں اصلاح نہیں کرتے ، وہ تنقید نہیں کرتے چاند پر پہنچتے ہیں ۔ سُنا ہے تنقید کرنا دنیا کا آسان ترین کام ہے اور اصلاح مشکل ترین ۔ ہم اس لیے تنقید کے ماہر ہیں کہ یہ آسان کام ہے وہ اس لیے تنقید کے ماہر نہیں ہیں کہ یہ آسان کام ہے ۔